असोज २१, काठमाडौं । नेपालमा आज (बुधवार) थप ३ हजार ४३९ जनामा कोरोना संक्रमण पुष्टि भएको छ । बुधवार थपिएका कोरोना संक्रमितको संख्या नेपालमा अहिलेसम्मकै उच्च हो ।
योसँगै नेपालमा कोरोना संक्रमितको संख्या ९० हजार ८१४ पुगेको छ । स्वास्थ्य तथा जनसंख्या मन्त्रालयका प्रवक्ता डा जागेश्वर गौतमका अनुसार गत २४ घण्टामा थप १५ जनाको कोरोना संक्रमणबाट मुत्यु भएको छ । योसँगै कोरोना संक्रमणबाट ५७८ जनाको मृत्यु पुष्टि भएको छ ।
मन्त्रालयका अनुसार बुधवारसम्ममा नेपालमा सक्रिय संक्रमितको संख्या २५ हजार ७ जना रहेका छन् । त्यसैगरी हाल क्वारेन्टाइनमा ४ हजार १६४ जना रहेका छन् । आईसोलेशनमा २५ हजार ७ जना रहेका छन् । विगत २४ घण्टामा मात्र १ हजार १२६ जना संक्रमणमुक्त भएका छन् ।मन्त्रालयका अनुसार गत २४ घण्टामा कोरोना निको हुनेको संख्या १ हजार १२६ रहेको छ ।
हाल संस्थागत आईसोलेसनमा १० हजार ५९६ जना र होम आईसोलेशनमा १४ हजार ४११ जना रहेका छन् । गत २४ घण्टामा १४ हजार २०९ ओटा पीसीआर परीक्षण भएको छ । हालसम्म मुलुकभर कुल ११ लाख १३ हजार ४८५ परीक्षण भइसकेको छ ।
प्रवक्ता गौतमले हालसम्म ६८ हजार ६६८ जना डिस्चार्ज भएको बताए । बुधवार थपिएका कोरोना संक्रमितमध्ये १ हजार ६८४ जना काठमाडौं उपत्यकाका रहेका छन् । संक्रमितमध्ये काठमाडौं जिल्लाका १ हजार २९६ जना, ललितपुर जिल्लाका २९३ जना र भक्तपुर जिल्लाका ९५ जनामा संक्रमण पुष्टि भएको हो।
प्रतिक्रिया दिनुहोस