कात्तिक २, काठमाडौं। दशैंमा बजाजको मोटरसाइकल किन्ने सोच बनाउनु भएको छ भने, नेपालमा बजाजका १० मोडलका १४ भेरियन्ट किन्न सक्नु हुने छ । बजाजको आधिकारीक वितरक हंशराज हुलास चन्द एण्ड कम्पनी प्रालिले बिक्री गर्दै आएको यी मोटरसाइकलको मूल्य १ लाख ७२ हजार ९०० रुपैयाँदेखि ५ लाख ४९ हजार ९०० रुपैयाँसम्म रहेका छन् ।
कम्पनीले सबैभन्दा कम मूल्यमा बिक्री गर्दै आएको मोडल बजाज प्लाटिना हो भने, सबैभन्दा महंगो मूल्यमा बिक्री गर्दै आएको मोडल बजाज डोमिनार ४०० हो ।
नेपालमा सर्वाधिक सफल मोडल भने बजाज पल्सर १५० हो । यसले आफ्नो सेग्मेन्टमा झण्डै ४५ प्रतिशतभन्दा बढी बजार हिस्सा ओगटेको छ । बजाजले पल्सर १५० लाई क्लासिक र डबल डिस्क भेरियन्टमा बिक्री गर्दै आएको छ । बजाज पल्सर १५० क्लासिकको मूल्य २ लाख ६० हजार ९०० रुपैयाँ रहेको छ भने, डबल डिस्क भेरियन्टको मूल्य २ लाख ७१ हजार ९०० रुपैयाँ तोकेको छ ।
पछिल्ला दिनमा निकै सफल रहेको पल्सर एनएस २०० नेपालमा दुई भेरियन्टमा बिक्री हुँदै आएको छ । कम्पनीले एबीएस र एफआई इन्जिनसहितको एनएस २०० को मूल्य ३ लाख ६० हजार ९०० रुपैयाँ निर्धारण गरेको छ । त्यस्तै काब्रुरेटर इन्जिन र एबीएसहितको एनएस २०० को मूल्य ३ लाख ३९ हजार ९०० रुपैयाँ तोकेर बिक्री गर्दै आएको छ ।
बजाज पल्सर एनएस १६० भने एउटा मात्रै भेरियन्टमा उपलब्ध रहेको छ । कम्पनीले यसमा एबीएस फिचर थप गरेर बिक्री गर्दै आएको छ । यसको मूल्य २ लाख ९० हजार ९०० रुपैयाँ निर्धारण गरिएको छ ।
बजाजको अर्को सफल मोडल पल्सर २२० एफको मूल्य ३ लाख ३६ हजार ९०० रुपैयाँ रहेको छ । यसमा पनि कम्पनीले एबीएस फिचर थप गरेर ल्याएको हो ।
कम्पनीले एभेन्जर क्रुजर मोडलको मूल्य ३ लाख ४५ हजार ९०० र एभेन्जर १६० स्ट्रीटको मूल्य ३ लाख १९ हजार ९०० रुपैयाँ निर्धारण गरेको छ ।
बजाज डिस्कभर नेपालमा ३ भेरियन्टमा बिक्री हुँदै आएको छ । कम्पनीले ल्याएको १२५ डिस्क एभेन्जरको मूल्य १ लाख ९९ हजार ९००, ड्रम भेरियन्टको मूल्य १ लाख ९२ हजार ९०० र स्टायडर्ड भेरियन्टको मूल्य २ लाख १० हजार ९०० निर्धारण गरेर बिक्री गर्दै आएको छ ।
प्रतिक्रिया दिनुहोस