नेपालगञ्जमा आज मध्यरातबाट लकडाउनको घोषणा

बैशाख ८, बाँके। बाँकेको नेपालगञ्जमा आज (बुधबार) मध्यरातबाट लागू हुने गरी लकडाउन घोषणा गरिएको छ ।

प्रमुख जिल्ला अधिकारी शिवराम गेलालले नेपालगञ्ज उपमहानगर क्षेत्रभर बुधबार मध्यरातिदेखि बैशाख १५ गतेसम्म लकडाउन हुने जानकारी दिनुभयो ।

उहाँले बुधबार बिहानसम्म सक्रिय संक्रमितको संख्या ७३५ पुगेसँगै अस्पतालहरु बिरामीले भरिएको अवस्थालाई गम्भीरतापूर्वक लिँदै लकडाउन गरिएको बताउनुभयो ।

कोरोना संक्रमण रोकथाम र नियन्त्रणका लागि लकडाउन गरिएको उहाँको भनाइ छ ।

लकडाउनको समयमा अत्यावश्यक सवारी साधनबाहेक अन्य सबै प्रकारका सेवा (तथा वित्तिय संस्था समेत) सञ्चालनमा रोक लगाइएको छ ।

यस्तै लकडाउन अवधिमा स्वास्थ्य, शान्ति सुरक्षा, दूरसञ्चार, खानेपानी, फोहाेरमैला व्यवस्थापन, पेट्रोलियम पदार्थ, तरकारी, खाद्यान्न तथा दुग्धपदार्थ, औषधिपसल, एटिएमजस्ता अत्यावश्यक सेवाहरू खुल्ला रहने प्रमुख जिल्ला अधिकारी गेलालद्वारा जारी सूचनामा उल्लेख छ । तर, खाद्यान्न तथा दुग्धपदार्थ र तरकारी पसल बिहान ६ बजेदेखि ९ बजेसम्म मात्र खोल्न पाइने भएको छ ।

सूचनाको बर्खिलाप गरे प्रचलित कानुनबमोजिम कारबाही गरिने प्रशासनले जनाएको छ ।

जिल्ला प्रशाासन कार्यालय बाँकेको सूचना :-