पाँचथर बस दुर्घटना अपडेट : मृतक संख्या ४ पुग्यो

कात्तिक ८, पाँचथर। मध्यपहाडी लोकमार्ग फिदिम खण्डको सखरखण्डे क्षेत्रमा आज (सोमबार) बिहान ११ बजे भएको बस दुर्घटनामा चार जनाको मृत्यु भएको छ।

लेटाङका ७ वर्षीय प्रज्वल मगर र इलामका ३४ वर्षीय प्रमिला देवान र उहाँको सात महिनाको छोरा निश्चल देवानको मृत्यु भएको प्रहरीले जनाएको छ। नाम बतन खुल्न बाँकी रहेको एक महिलाको पनि मृत्यु भएको प्रहरी निरीक्षक डम्बर डाँगीले बताउनुभयाे।

पाँचथरको कुम्मायक गाउँपालिका र फिदिम नगरपालिको सीमा निबुखोलाबाट यात्रु लिएर झापा जाने क्रममा को १ ख ३८६५ नम्बरको बस दुर्घटना भएको हो।

दुर्घटनामा ६५ जना घाइते भएकामा चारको मृत्यु भएको हो । थप उपचारका लागि झापातर्फ चार जनालाई रेफर गरिएकोमा बाटैमा एक जनाको मृत्यु भएको प्रहरीकाे भनाइ छ । तीन जनाको फिदिम स्थितकै अस्पतालहरुमो मृत्यु भएको हो।

चालक सहचालक दुबै गम्भीर घाइते अवस्थामै रहेकाले दुर्घटनाको कारण बुझ्न नपाइरहेको र यस बारेमा अनुसन्धान भइरहेको प्रहरी भनाइ छ।