पाँचखाल \ युक्रेनी सेनाको कब्जामा रहेका मण्डनदेउपुरका सिद्धार्थ ढकालको जीवनरक्षा गरी स्वदेश फकाईदिन परिवार, आफन्त र जनप्रतिनिधीले प्रधानमन्त्री पुष्पकमल दाहालको ध्यानाकर्षण गराएका छन् ।
महिला उद्यमी हरित औद्योगिक पार्कको शिलान्यास कार्यक्रममा सहभागी हुन पाँचखाल आएका प्रधानमन्त्री दाहाललाई कार्यक्रमस्थलमा नै भेटेर उनको जीवनरक्षा र रिहाइको लागि ध्यानाकर्षण गराएको मण्डनदेउपुर नगरपालिका वडा नं ६ का अध्यक्ष सोमप्रसाद ढकाल (कुमार)ले जानकारी दिए ।
सिद्धार्थका ठूलो बुबा ,माइलो बुबा ,दिपक ढकाल, गोकुल डोटेल लगायतले भेटेर प्रधानमन्त्रीको ध्यानकर्षण गराएका हुन् ।
उच्च शिक्षा अध्ययनको लागि रसिया गएका सिद्धार्थ कलेजमा बुझाउने पैसा दलाल (एजेन्ट) ले नहालिदिएपछि रोजगारीको लागि रसियाली सेनामा भर्ती भएका थिए ।
२०८० मंसिर १८ गते उनलाई युक्रेनी सेनाले कब्जामा लिएको भन्दै उद्धारको लागि पहल गरिदिन सरकारलाई अनुरोध गरेको भिडियो सार्वजनिक भएको थियो । मंसिर १९ गते नै वडाअध्यक्ष ढकाल, नेपाली कांग्रेस काभ्रेका सचिव माधव ढकाल, एमाले नेता नवराज ढकालसहित परिवारका सदस्यले परराष्ट्रमन्त्री एन.पी साउदलाई भेटेर रिहाइको लागि पहल गरिदिन अनुरोध गरेका थिए ।
प्रधानमन्त्री दाहालले परिवारसंगको कुराकानीमा रिहाइको पहल गरिएको भन्दै चिन्ता नलिन अनुरोध गरेका थिए । काठमाडौं विश्वविद्यालयको दीक्षान्त समारोहमा पनि प्रधानमन्त्री दाहालले अहिले विभिन्न बाध्यताका कारण २ सय भन्दा बढी नेपाली युवाहरू रुसी सेनामा भर्ना भएको खबर चिन्ताजनक भएको भन्दै सरकार तिनलाई सकुशल फिर्ता ल्याउन हरसम्भव प्रयास गरिरहेको बताएका थिए ।
सिद्धार्थको सार्वजनिक भएको भिडियो सन्देशमा रेडजोनमा रहेका मध्ये धेरै मारिएको भन्दै नेपाल सरकारलाई जतिसक्दो चाँडो निकाल्नु भनेर खबर सुनाइदिनु भनिएको छ ।
प्रतिक्रिया दिनुहोस