छुट भएका बालबालिकालाई जेठ १३ देखि पोलियो विरुद्धको खोप लगाइने

धुलिखेल /  खोप आपुर्ति बन्द हुँदा पोलियो विरुद्धको खोप लगाउन छुट भएका बालबालिकालाई जेठ १३ गतेदेखि अभियान चलाएर खोप लगाउन लागिएको छ ।

सुई मार्फत लगाइने पोलियो विरुद्धको खोप (आइपिभी) २०७३ जेठ देखि २०७५ भाद्रसम्म नेपालमा आपुर्ति बन्द भएको थियो ।

२०७३ वैशाखदेखि २०७५ आश्विनभित्र जन्मिएका बालबालिकालाई अभियान अन्तर्गत जेठ १३ गतेदेखि २६ गतेसम्म खोप लगाइने समितिका सदस्य–सचिव समेत रहेका जनस्वास्थ्य कार्यालय काभ्रेका प्रमुख रागिश्री कक्षपति श्रेष्ठले जानकारी दिइन् ।

जनस्वास्थ्य कार्यालय काभ्रेका खोप अधिकृत पार्थमणि न्यौपानेका अनुसार, १३ वटा स्थानीय तहका १७ हजार ७ सय ५९ बालबालिकालाई खोप लगाउने लक्ष्य छ । विद्यालय बाहिर रहेका बालबालिकालाई अभियानमा समेट्ने चुनौती रहेको उनले बताए ।

विद्यालयमा सञ्चालन गरिने खोप केन्द्रका लागि २ सय ६१ खोपकर्मी र ५ सय ११ शिक्षकलाई अनुशिक्षण गरिसकिएको जनस्वास्थ्य कार्यालयले जनाएको छ ।

मुखबाट खुवाइने पोलियो विरुद्धको खोप (ओपीभि) को परिपुरकको रुपमा २०७१ आश्विनबाट नेपालमा सुईबाट लगाइने पोलियो विरुद्धको खोप (आइपीभि) लगाउन शुरु गरिएको थियो । ५ बर्ष मुनिका बालबालिकालाई पोलियोको जोखिम बढी हुन्छ । पोलियो लागेमा पक्षघातको जोखिम हुन्छ ।

जिल्ला खोप समन्वय समितिका संयोजक रहेका जिल्ला समन्वय समिति काभ्रेका प्रमुख दिपककुमार गौतमले बालबालिकाको स्वास्थ्यलाई ख्यालमा राखि अभियान सञ्चालन गरिएको भन्दै तयारी र सावधानी अपनाउन अनुरोध गरे ।

प्रमुख जिल्ला अधिकारी रुद्रादेवी शर्माले सबै लक्षित वर्गले खोप पाउने गरी अभियान चलाउन अनुरोध गरिन् ।