वी.पी राजमार्गमा काभ्रेतर्फ विभिन्न स्थानमा सडक अवरुद्ध, खुलाउने प्रयास जारी

भकुण्डेवेशी / वी.पी राजमार्ग अन्तर्गत काभ्रेतर्फ रोशी गाउँपालिकाको विभिन्न स्थानमा सडक अवरुद्ध भएको छ ।

रोशी गाउँपालिकाको वडा नम्बर ८ नार्के, चारसय बेसी, वडा नम्बर ९ मंगलटारको मंगल जनविजय माध्यामिक विद्यालय अगाडि, वडा नम्बर ११ कालढुङगा र वडा नम्बर १२ माम्तीमा खहरेखोलाबाट लेदो आएर सडक अवरुद्ध भएको जिल्ला प्रहरी कार्यालय काभ्रेका प्रवक्ता समेत रहेका प्रहरी नायव उपरिक्षक (डिएसपी) राजकुमार श्रेष्ठले जानकारी दिए ।

रोशी गाउँपालिका वडा नं ७ र नमोबुद्ध नगरपालिका वडा नं ५ को सिमाना लासकोट स्थित वी.पी. राजमार्गमा खहरेखोलाबाट लेदो आइ सडक अवरोध भएकोमा स्थानीय सरकारको समन्वयमा डोजर र स्काभेटरले अवरोध हटाई सडक एकतर्फी खुल्ला गरिएको प्रहरीले जनाएको छ ।

यता, पाँचखाल नगरपालिका वडा नं ८, बाउन्न किलोस्थित अरनिको राजमार्गमा खहरेखोलाबाट लेदो आई सडक अवरोध भएकोमा प्रहरी टोलीले खटि गई स्थानीय सरकारको समन्वयमा डोजर र स्काभेटरमार्फत अवरोध हटाइ बाटो एकतर्फी खुल्ला गरिएको प्रहरीले जनाएको छ ।

अविरल बर्षापछिको बाढी र पहिरोको कारण वी.पी राजमार्ग, अरनिको राजमार्ग र अन्य ग्रामिण सडकहरु अवरोध भएकोले सावधानी अपनाउन पनि प्रहरीले अनुरोध गरेको छ ।