श्रीकृष्ण अष्टमीको दिन काभ्रेमा करिब १० हजार कन्या पूजिए

बनेपा /  यो बर्ष पनि श्रीकृष्ण जन्माष्टमीका अवसरमा सोमबार काभ्रेमा १० हजार कन्या पूजिएका छन् ।

जिल्लामा नेवार समुदायको बसोवास रहेको श्रीखण्डपुुर, दाप्चा, साँगा, जनागाल, बुडोल, २८ किलो, पलाञ्चोक लगायतका स्थानमा कन्या पूजा गरिएको हो ।

बनेपामा १२२ वर्षअघि शुरु भएको कन्यापूजा यो बर्ष पनि निरन्तर भयो । कारोना संक्रमणका कारण २०७७ र २०७८ मा रोकिएको कन्यापूजा २०७९ देखि पुन सञ्चालन भएको थियो ।

छोरीलाई अझै पनि ‘हेय’को दृष्टिकोणबाट हेर्ने नेपाली समाजलाई उदाहरण स्वरुप काभ्रेका विभिन्न स्थानमा छोरीलाई देवीको रुपमा पुज्ने चलन छ । यसरी पुज्दा जातको पनि कुनै भेदभाव छैन । सबै जात, धर्म र समुदायका अन्दाजी १० हजार कन्या पुजिने गरेका छन् । रजस्वला नभएका बालिकाहरुलाई कन्याको रुपमा पुज्ने गरिन्छ । यसरी पुजा गर्दा कन्याहरु निरोगी हुने, सुखसम्पत्ति पाई खुशी हुने र कन्याहरुलाई दान दक्षिणा दिनेको पनि मनुष्य जीवन सफल हुने धार्मिक आस्था रहेको सनातन कन्या पूजा प्रवन्ध समितिका कोषाध्यक्ष दिनेशराज कायस्थले जानकारी दिए ।

वि.सं. १९५९ साल भाद्र कृष्ण सप्तमीको दिनदेखि सुरु भएको कन्या पुजा नेपालकै एक मात्र कन्याहरु पुज्ने पर्व हो । कन्याहरुलाई पूजा गरेमा कन्या पुज्नेहरु तथा पुजिने दुवै निरोगी हुने धार्मिक विश्वास समेत छ । कन्याहरुको लाममा देवकन्या, नागकन्या, गन्धर्वकन्या, किन्नर कन्या र किचकन्या समेत मानव कन्याका भेषमा आउने भएकोले उनीहरुलाई आराध्यदेवी चण्डेश्वरी माईकी कुमारी मानी पूजा गरेमा कर्म सार्थक हुने जनविश्वास छ ।

भोलाखाँ टोलबाट तिनधारा तथा पुरानो बजार हुँदै चारदोबाटोसम्म सडकको दायाँबायाँ पेटीमा कन्या लस्करै बस्छन् । सनातन कन्या पुजा प्रवन्ध समिति तथा व्यक्तिगत गरि देशभरबाट आएका दाताहरुले ल्याएको पेडा, स्वारी, जेरी, मालपुवा, सेल, फलफुल, पैसा, विस्कुट लगायतका सामान दान दिइने गरिन्छ । कन्या पूजाको लागि काभ्रे जिल्लाको अलावा सिन्धुपाल्चोक, दोलखा, रामेछाप, काठमाडौ, भक्तपुर, ललितपुर, मकवानपुर, पोखरा लगायतका विभिन्न जिल्लाबाट हजारौ दर्शनार्थीहरुका साथै पुजिनको लागि कन्याहरु आउने गरेको कायस्थले जानकारी दिए । भोलाखाँ टोलमा गणेश र कुमारको पूजा भएपछि मात्र कन्या पूजा सुरू हुन्छ ।

सोमबार बनेपामा भएको कन्या पूजामा कलाकारहरु किरण के.सी., आँचल शर्मा, विजय लामा, बिवेक कर्माचार्य, रबीन्द्र खड़का, कुसुम शर्मालगायत सहभागी भएर कापी, बिस्कुटलगायत सामग्री वितरण गरेका थिए ।