नमोबुद्ध / जिल्ला समन्वय समिति काभ्रेपलाञ्चोक र नमोबुद्ध नगरपालिकाको लागत साझेदाराीमा सञ्चालित ३ विकास योजनाको संयुक्त अनुगमन गरिएको छ ।
५०/५० प्रतिशत लागत साझेदारीमा नमोबुद्ध वडा नं ३ स्थित राम माध्यमिक विद्यालय, वडा नं ४ कार्यालयको घेरावार र मेथिनकोट अस्पतालमा निर्माण गरिएका संरचना अनुगमन गरिएको हो ।
जिल्ला समन्वय समिति काभ्रेका प्रमुख दिपक गौतम, उपप्रमुख रिमबहादुर तामाङ, नमोबुद्ध नगरपालिकाका उपप्रमुख रत्न लामा, जिल्ला समन्वय अधिकारी पिताम्बर पाण्डे, नमोबुद्ध नगरपालिकाका प्रमुख प्रशासकीय अधिकृत शेषकान्त पौडेल, वडा नम्बर ३ का वडाध्यक्ष रमेश तिवारी, वडा नम्बर ४ का वडाध्यक्ष अर्जुनबहादुर कार्की र जिल्ला समन्वय समिति र नगरपालिकाका प्राविधिक टोलीले ती योजना अनुगमन गरेको हो ।
२४ लाखको लागतमा राम माविमा मेसिनरी वाल, पक्की वालसहितको घेराबार, तारजाली र गेट निर्माण गरिएको छ ।
१६ लाखको लागतमा वडा नम्बर ४ को कार्यालयमा ढुंगाको गाह्रो, तार जाली, चौतारा निर्माण गर्नुका साथै बाटो ढलान गरिएको छ ।
मेथिनकोट अस्पतालमा एमआरआई मेसिन सञ्चालनका लागि आवश्यक पूर्वाधार निर्माण गर्न समन्वयले ६ लाख ५० हजार र नगरपालिकाले ६ लाख ५० हजार रुपैयाँ लागत साझेदारी गरेका छन् ।
प्राविधिक स्टमेट अनुसार निर्माण सन्तोषजनक भएको पाइएकोले भुक्तानीको लागि सिफारिस गरेको जिल्ला समन्वय समितिका प्रमुख गौतमले बताए ।
प्रतिक्रिया दिनुहोस