बाढी पहिरो अपडेटः काभ्रेमा १० जनाको मृत्यु, २८ जना वेपत्ता, ७० भन्दा बढीलाई उद्धार

बनेपा / अविरल बर्षापछिको बाढी र पहिरोको कारण हालसम्म काभ्रेमा १० जनाले ज्यान गुमाएका छन् ।

विभिन्न स्थानमा पहिरोले पुरिएर १० जनाको मृत्यु भएको यकिन गरिएको जिल्ला प्रहरी कार्यालय काभ्रेका प्रमुख एसपी बसुन्धरा खड्काले जानकारी दिइन् ।

जिल्ला प्रहरी कार्यालय काभ्रेका अनुसार, २८ जना बेपत्ता भएका छन् । १६ जना घाइते भएका छन् भने बाढी र पहिरोमा फसेका ७० भन्दा बढीलाई उद्धार गरिएको छ ।

तेमाल गाउँपालिका वडा नं २ स्थित डडेनपाखामा दुई घर पहिरोले पुरेको छ । घर भित्र ९ जना रहेको जानकारी प्राप्त भएपनि मौसमका कारण अझै उद्धार हुन सकेको छैन ।

प्रहरी चौकी खोपासीका अनुसार, पनौती नगरपालिका वडा नं ११, थुम्कीमा स्थानीयको घर पुरिँदा ४ जना वेपत्ता भएका छन् ।

जिल्लामा खोला, नदीका तटीय क्षेत्र डुबानमा परेका छन् भने वी.पी राजमार्गका केही सडक खण्ड रोशी खोलाले बगाएको छ । अरनिको राजमार्गका विभिन्न स्थानमा पहिरोको कारण सडक अवरुद्ध भएका छन् ।

वी.पी राजमार्ग अवरुद्ध भएपछि अलपत्र भएकालाई उद्धारको लागि गएको नेपाली सेनाको हेलिकप्टर पनि अवतरण गर्न नसकेर फर्किएको छ । स्थानीय शान्ती बुद्ध प्रावि लगायतका स्थानमा आश्रयमा रहेकालाई गाउँपालिकाले खाद्यान उपलव्ध गराएको गाउँपालिका अध्यक्ष दिनेश लामाले जानकारी दिए ।

सुरक्षा र सतकर्ता अपनाउन जिल्ला विपद व्यवस्थापन समितिले सबैमा अनुरोध गरेको छ ।