पहिरोमा ज्यान गुमाउनेका परिवारलाई कांग्रेस बनेपाले दियो जनही २५ हजार

बनेपा / असोज १० गतेदेखिको अविरल वर्षापछिको पहिरोमा ज्यान गुमाउनेको परिवारलाई नेपाली कांग्रेस बनेपाले नगद राहत उपलव्ध गराएको छ ।

स्थानीय जनप्रतिनिधि, वडा, नगर कार्यसमिति तथा जिल्लाका नेताहरुको रोहवरमा नेपाली कांग्रेस बनेपा नगरका सभापति महेश कुमार कर्माचार्यले जनही २५ हजारका दरले राहत रकम हस्तान्तरण गरेका हुन् ।

पहिरोमा ज्यान गुमाउने बनेपा वडा नं १० का युविन हुमागाईको परिवारलाई २५ हजार, बनेपा वडा नं १४ मा ज्यान गुमाएका बाबु छोरी मिलन तामाङ र छोरी सुनिताको परिवारलाई ५० हजार र वनेपा वडा नं ५ का ऋषिकेश दाहालको परिवारलाई २५ हजार राहत रकम हस्तान्तरण गरिएको हो ।

बाढी तथा पहिरो पीडित परिवारलाई सहयोग गर्ने उद्देश्यले नेपाली कांग्रेस बनेपा नगर कार्यसमितिले राहत कोष स्थापना गरेको छ ।

कोषमा पार्टीका विभिन्न तहका नेता तथा शुभेच्छुकले सहयोग गरेका छन् ।