दशैंको विदामा पनि रोशी गाउँपालिकाका स्वास्थ्य संस्थाले सेवा दिने

रोशी / लामो विदा रहने वडा दशैंमा पनि रोशी गाउँपालिकाका स्वास्थ्य संस्थाले सेवा दिने भएका छन् ।

असोज १० गतेदेखिको अविरल बर्षापछिको बाढी पहिरोले बढी क्षति पुगेको रोशीमा खानेपानी लगायतबाट महामारीजन्य रोग फैलन नदिन त्यहाँका १४ सरकारी स्वास्थ्य संस्थाले दशैंको समयमा पनि सेवा दिनेछन् ।

रोशी गाउँपालिका विपद् व्यवस्थापन समितिको बैठकले सम्भावित महामारी रोकथाम, नियन्त्रणका लागि सबै स्वास्थ्य संस्था खुल्ला राखी सेवा दिने निर्णय गरेको गाउँपालिका अध्यक्ष दिनेश लामाले जानकारी दिए ।

गाउँपालिकामा रहेको १५ शैयाको अस्पताल भवन निर्माणाधीन अवस्थामै बाढीले बगाएको छ । रोशी १ मा रहेको स्वास्थ्यचौकी पनि पूर्ण रुपमा क्षति भएको छ ।

बाढी पहिरोमा परेर रोशी क्षेत्रमा १२ जनाले ज्यान गुमाएका छन् भने अधिकाशं घरमा क्षति पुगेको छ । खेतीयोग्य जमिन र बाली नाली नष्ट भएका छन् ।