काभ्रे / गृहमन्त्री रमेश लेखकले काभ्रेमा बाढी र पहिरोले बढी क्षतिग्रस्त क्षेत्रको स्थलगत निरिक्षण गरेका छन् ।
सोमबार विहान काभ्रे आएका गृहमन्त्री लेखकले पनौती वडा नं १२ को रोशी बजार क्षेत्र, बेथानचोक वडा नं ४ को पाटीखर्क, सलान्दु बगर र चलाल गणेशस्थान र वी.पी. राजमार्गमा पर्ने नमोबुद्ध नगरपालिकाको चौकीडाँडा र रोशी गाउँपालिकाको कटुञ्जे क्षेत्रको स्थलगत निरिक्षण गरेका हुन् ।
बढी प्रभावित क्षेत्रमा पुगेर गृहमन्त्री लेखकले त्यहाँका स्थानीय, जनप्रतिनिधीसंग क्षति, खोज, उद्धार, राहत लगायतका बिषयमा जानकारी लिएका थिए ।
पनौती नगरपालिका वडा नं १२ रोशी बजार क्षेत्रमा नगरपालिका प्रमुख राममशरण भण्डारीले त्यहाँ भएको क्षति,खोज, उद्धार र राहत व्यवस्थापनका बारेमा जानकारी गराउँदै पुनर्निमार्ण र पुनर्स्थापनामा प्राथमकिता दिन अनुरोध गरेका थिए ।
बाढीपहिरोबाट नगरभित्रमा भएको क्षति, त्यसले नागरिकको आवास, खाद्यान्न र स्वास्थस्थितिमा पु¥याएको समस्याको बारेमा नगरपालिकाले गरिरहेको उद्धार, राहत र पछिल्लो समयमा नभएको पुनर्स्थापना लगायतको विषयमा मन्त्री लेखकलाई जानकारी गराउनुभएको थियो ।
बेथानचोक वडा नं ४ मा गाउँपालिका अध्यक्ष भगवान अधिकारी, वडाअध्यक्ष कृष्णबहादुर तामाङ लगायतले त्यहाँको वस्तुस्थितीबारे जानकारी गराएका थिए । गाउँपालिका अध्यक्ष अधिकारीले खोज र उद्धार पछि सडक पहुँच बनाउन गाउँपालिकाले काम गरिरहेको जानकारी दिएका थिए ।
वी.पी. राजमार्ग हुँदै नमोबुद्ध नगरपालिका वडा नं ६ चौकीडाँडा र रोशी गाउँपालिका वडा नं ७ कटुञ्जेवशी पुगेका मन्त्री लेखकलाई नमोबुद्ध नगर प्रमुख कुनसाङ लामा, रोशी गाउँपालिका अध्यक्ष दिनेश लामाले रोशी खोलाले राजमार्ग र वस्तीमा पुर्याएको क्षति जानकारी गराएका थिए ।
चलालमा नेपाल प्रहरी अस्पताल र पनौतीमा शसस्त्र प्रहरी अस्पतालले गरेको स्वास्थ्य शिविर निरिक्षण गरेका मन्त्री लेखकले स्वास्थ्यकर्मीले गरेको सेवाप्रति आभार प्रकट गर्दै थप सेवा दिन अनुरोध गरे ।
प्रतिक्रिया दिनुहोस