काभ्रेका विभिन्न स्थानमा मनाइयो छठ पर्व

काभ्रे /  काभ्रेपलाञ्चोक जिल्लाका विभिन्न स्थानमा छठ पर्व मनाईएको छ ।

विभिन्न पेशा र व्यवसायको क्रममा लामो समय देखि जिल्लाको बनेपा, दोलालघाट क्षेत्रमा रहेका तराईमुलका नागरिकले त्यहाँका पोखरी, खोलामा सुर्यको अनुष्ठान गरी छठ पर्व मनाएका हुन् ।

बनेपा गणेशस्थानस्थित पोखरी, दोलालघाटस्थित इन्द्रावती र सुनकोशी नदीमा उदाउँदो सुर्यलाई अघ्र्य दिएर छठ समापन गरिएको हो ।

सन्तान प्राप्ति, रोग निदान र पारिवारिक कल्याणका लागि मनाइने छठ पर्वका अनुष्ठान मंगलबारदेखि नै सुरु भएर बिहीबा अस्ताउँदो सूर्य र शुक्रबार बिहान (आज) उदाउँदो सूर्यलाई अर्घ्य दिएर समापन भएको हो ।

पुत्र, पति र परिवारको कल्याण तथा पृथ्वीमा पर्याप्त प्रकाश छरेको भन्दै सूर्यलाई धन्यवाद दिनु छठ पर्वको महत्व हो । कात्तिक शुक्ल षष्ठी र चैती गरी छठ पर्व वर्षमा दुई पटक मनाइन्छ ।

सूर्य पुराणअनुसार सर्वप्रथम अत्रिमुनिका पत्नी अनसुइयाले छठ व्रत गरेपश्चात अटल शौभाग्य र इच्छा पूरा भएपछि त्यही दिनदेखि छठ पर्वको सुरुआत भएको मान्यता छ ।