बनेपा / भगवान विष्णुको उपसना र तुलसीको विवाह गरिने हरिबोधनी एकादशी आज । वर्षभर पर्ने चौबीसवटा एकादशीमध्ये हरिवोधनीलाई ‘ठूलो एकादशी’ को रुपमा लिइन्छ ।
आषाढ शुक्ल एकादशीको दिन क्षीर सागरमा सुतेका भगवान विष्णु आजैको दिन उठ्ने पुराणहरूमा उल्लेख छ । यसैकारण यस दिनलाई हरिबोधिनी एकादशी भनिएको भन्ने विश्वास गरिन्छ ।
आषाढ शुक्ल एकादशीको दिन घरमा रोपिएको तुलसीलाई आजको दिन मठ सिंगारेर विशेष पूजा गरी विष्णु भगवानका अर्का रुप पीपलसँग विवाह गरिदिने परम्परा छ ।
आजको दिन सखरखण्ड, पिंडालु आदि कन्दमूल र फलफूल प्रसादको रुपमा खाने चलन रहेको छ।
आज पनौती नगरपालिका वडा नं ११ बल्थली स्थित लड्केश्वर क्षेत्र, काठमाडौं उपत्यकाका चार नारायण–चाँगुनारायण, इचंगु नारायण, विशंखुनारायण र शेषनारायण लगायत देशभरका विष्णु मन्दिरहरूमा भक्तजनहरुको भीड लागेको छ । काठमाडौंका पशुपतिनाथ र बुढानीलकण्ठ मन्दिरमा पनि आज भक्तजनको भिड बिहानैदेखि लागेको छ ।
प्रतिक्रिया दिनुहोस