दाप्चा / बहुचर्चित ‘छक्का पञ्जा ५’ फिल्म निर्माण गरेको आमा सरस्वती मुभिज प्रा. लिले नमोबुद्ध नगरपालिका वडा नं ९ को गहते डिहिमा ४ हजार ५ सय मिटर खानेपानीको पाइप सहयोग गरेको छ ।
वडा नं ९ का विभिन्न स्थानमा छायाकंन गरिएको छक्का पञ्जा ४ र छक्का पञ्जा ५ ले अपार सफलता पाएपछि त्यसको श्रेय सो स्थानलाई समेत दिँदै कलाकार दिपकराज गिरी, दिपा श्री निरौला, निर्मल शर्मा सहितको टोलीले करिब ६ लाख बराबरको सहयोग गरेको हो ।
गत असोज १० देखि १२ गतेसम्मको अविरल बर्षापछिको बाढी र पहिरोका कारण त्यहाँका खानेपानी वितरण प्रभावित भएपछि वडा नं ९ का अध्यक्ष विरबहादुर लामा, दाप्चा बजार पुनर्उत्थान समितिका अध्यक्ष सञ्जय श्रेष्ठसहितले सहयोगको लागि पहल गरेका थिए ।
सहयोग हस्तान्तरण गर्दै कलाकार गिरीले आफ्नो सफलताको एउटा हिस्सा दाप्चा क्षेत्र समेत भएकोले सहयोग गरिएको बताउँदै खानेपानी आएपछि कलाकारसहितको टोली आएर रमाईलो गर्ने बताए ।
वडाअध्यक्ष विरबहादुर लामाले गाउँको समस्या समाधानको लागि सहयोग गरेकोमा आभार प्रकट गरे ।
हस्तान्तरण कार्यक्रममा कार्यपालिका सदस्य गिता श्रेष्ठ, वडा सदस्य कान्छामान तामाङ, वडा सचिव गोकुल अधिकारी लगायतको उपस्थिती थियो ।
प्रतिक्रिया दिनुहोस