भकुण्डेवेशी / नेपाल पत्रकार महासंघ काभ्रेको १२ औं जिल्ला अधिवेशनबाट निर्वाचित कार्यसमितिलाई नमोबुद्ध नगरपालिकाले बधाई तथा शुभकामना व्यक्त गरेको छ ।
नमोबुद्ध नगर प्रमुख कुनसाङ लामाले मंसिर २८ गते सम्पन्न अधिवेशनबाट विनोदकुमार न्यौपानेको नेतृत्वमा निर्वाचित कार्यसमितिलाई बधाई तथा शुभकामना व्यक्त गरेका हुन् ।
नगर प्रमुख लामाले जुनसुकै कठिन अवस्थामा पनि भूमिका खेल्दै आएका राज्यको चौथो अंग सञ्चार क्षेत्रलाई सम्मान गर्न पाएकोमा खुशी गर्दै आफ्ना कमिकमजोरी भए कलम चलाएर सच्चिने मौका दिनुपर्ने बताए ।
नेपाल पत्रकार महासंघ काभ्रे शाखाका अध्यक्ष विनोद न्यौपानेले नमोबुद्ध नगरपालिकासंग विगतमा जस्तै सहकार्य हुने विश्वास व्यक्त गरे ।
प्रमुख प्रशासकीय अधिकृत कृष्ण गिरीले डिजिटल युगमा पत्रकारिताका स्वरुप फेरिएको भन्दै समाज परिवर्तनको मुद्धामा खरो उत्रन अनुरोध गरे ।
कार्यक्रममा नेपाल पत्रकार महासंघ काभ्रेका पूर्व अध्यक्ष बद्रिराज तिमिल्सिना, मोतिराम तिमल्सिना, नमोबुद्ध नगर युवा परिषद्का कार्यकारी उपाध्यक्ष रामेश्वर अधिकारी, विभिन्न शाखा प्रमुखहरुको उपस्थिती थियो ।
प्रतिक्रिया दिनुहोस