बनेपा / बनेपामा रहेको बेलर इन्टरनेशनल एकेडेमीमा राष्ट्रिय स्तरको फुटसल मैदान निर्माण गरिएको छ ।
करिब ४ रोपनी क्षेत्रफलमा ‘राष्ट्रिय स्तर’को प्रतियोगिता गर्ने मापदण्ड पुरा गरेको फुटसल मैदान तयार गरिएको प्रिन्सिपल इन्दु थापाले जानकारी दिइन् । थापाका अनुसार फुटसलका अतिरिक्त क्याफ्टेरिया, बाड्मिन्टन कोर्ट र जिमसहितका पूर्वाधार तयार गरिँदैछ । २ तलाको फुटसलमा दर्शकहरु माथिल्लो तलामा बसेर खेल हेर्ने र क्याफेको सुविधा लिन सक्नेछन् । १०५ फिट लम्बाई र ६५ फिट चौडाईका खेलमैदानमा ५ए साइड खेल खेलाइने इञ्चार्ज मनोज बस्नेतले जानकारी दिए ।
नवनिर्मित फुटसलको शुभारम्भ काभ्रेका सञ्चारकर्मी र बेलर स्कुलका शिक्षक, कर्मचारीबिच मैत्रीपूर्ण फुटसल गरेर गरिएको छ । बेलरका तर्फबाट ६ गोल राम खड्काले र सञ्चारकर्मीका तर्फबाट ५ गोल भएको थियो । पत्रकार सरोज अधिकारीले १ गोल गरेर खाता खोलेका सञ्चारकर्मीको तर्फबाट देवराज केसीले थप ४ गोल गरेका थिए ।
सोही कार्यक्रममा बेलर इन्टरनेशनल एकेडेमीले नेपाल पत्रकार महासंघ काभ्रे शाखाको नवनिर्वाचित कार्यसमिति, केन्द्रीय र प्रदेश प्रतिनिधी समेतलाई सम्मान गरेको छ । नेपाल पत्रकार महासंघ काभ्रे शाखाका सल्लाहकार समेत रहेका बेलर स्कुल सञ्चालक समितिका अध्यक्ष भोला थापा, प्रिन्सिपल इन्दु थापा लगायतले बधाई तथा शुभकामना दिएका थिए ।
कार्यक्रममा नेपाल पत्रकार महासंघ काभ्रे शाखाका सल्लाहकार इश्वरी ओझा, महेशराज पौडेल, मोतिराम तिमल्सिना, बद्रिराज तिमल्सिना, अग्रज पत्रकार मधुसुदन गुरागाई, भगवती तिमल्सिना लगायत जिल्लाका कृयाशिल सञ्चारकर्मीको उपस्थिती थियो ।
प्रतिक्रिया दिनुहोस