कृषक महिला र घरेलु श्रमिक महिलाका श्रम सबालबारे छलफल

धुलिखेल / जिल्लामा कृषक महिला र घरेलु श्रमिक महिलाका श्रम सबालबारे छलफल गरिएको छ ।

तरङ्गिणी फाउण्डेसनले धुलिखेलमा गरेको कार्यक्रममा वक्ताहरुले समान कामको लागि समान ज्याला हुन नसकेको, आम्दानीसंग महिला प्रत्यक्ष नजोडिएका कारण घरेलु हिंसामा पर्ने गरेको बताए ।

प्रमुख जिल्ला अधिकारी उमेशकुमार ढकालले कानूनहरु स्पष्ट भएपनि कार्यान्वयनमा समस्या भएको भन्दै चेतनामार्फत समाधान गर्दै जानुपर्ने बताए । जिल्ला प्रशासन कार्यालय महिलाका हक अधिकार स्थापित गराउने नै काम गर्ने भन्दै त्यसमा आफू प्रतिवद्ध र जानकार भएको बताए ।

जिल्ला प्रहरी कार्यालय काभ्रेपलाञ्चोकका प्रमुख प्रहरी उपरिक्षक बसुन्धरा खड्काले श्रमिक महिलाहरुले ज्याला नै नपाएको, हिंसा भोगेको उजुरी प्रहरीको आउने गरेको भन्दै सुन लगायतको मुल्यको कारण पनि हत्या गरेका घटना भएको बताइन् ।

जिल्ला प्रहरी कार्यालयको महिला, बालबालिका सेवा केन्द्र प्रमुख रहेका प्रहरी निरिक्षक सरस्वती कार्कीले केन्द्रमा आउने उजुरीमध्ये ८० प्रतिशत भन्दा बढी घरेलु महिला श्रमिक, ज्याला मजदुरी, निर्माण लगायतमा संलग्न महिलाको आउने गरेको भन्दै आर्थिक पाटो कमजोर भएपछि हिंसा हुने गरेको बताइन् ।

अधिकारकर्मी निर्मला काफ्लेले महिला र पुरुष कामदार विच ज्यालामा समेत विभेद भएको भन्दै समान कामको लागि समान ज्यालाको मुद्धा उठाउँदै आएको बताइन् । घरेलु श्रम र कृषिमा संलग्नलाई श्रम ऐनले समेत श्रमिक भनेर नचिनेको भन्दै उनले आर्थिक पक्ष सबल नभएकै कारण महिलाहरु नागरिकता लगायतका अधिकारबाट बञ्चित हुँदै आएको तर्क गरिन् ।

तरङ्गिणी फाउण्डेसनले पनौती नगरपालिका वडा नं ८ र ९, बनेपा नगरपालिका वडा नं १ र ४ का साथै पाँचखाल वडा नं १२ मा कृषक महिला सञ्जाल बनाएर कृषि तथा घरेलु श्रमिक महिलाका सबालमा काम गरिरहेको छ ।

तरङ्गिणी फाउण्डेसनका अनुगमन तथा मुल्याकंन अधिकृत शत्रुघन सिंहले नेपालमा ३० लाख महिला श्रमिक रहेको तथ्य प्रस्तुत गर्दै ती मध्ये ३० प्रतिशत अनौपचारिक क्षेत्रमा रहेको बताए ।