भकुण्डेवेशी / शहरी क्षेत्रमा रहनसहन, खानपान लगायतका कारण नसर्ने रोगको जोखिम बढेको भन्दै ६ वटा नगरपालिकामा नियन्त्रणका लागि कार्यक्रम लागू गरिएको छ ।
संघीय सरकारको विशेष अनुदानमार्फत धुलिखेल, बनेपा, पनौती, पाँचखाल, नमोबुद्ध र मण्डनदेउपुरको शहरी क्षेत्रमा कार्यक्रम लागू गरिएको जनस्वास्थ्य कार्यालय काभ्रेका प्रमुख रागिश्री कक्षपति श्रेष्ठले जानकारी दिए ।
जनस्वास्थ्य कार्यालय काभ्रेका फोकल पर्सन पद्मराज कैनीका अनुसार, कार्यक्रम अन्तर्गत स्वास्थ्य प्रवद्र्धनको लागि व्यायामशाला निर्माण, परामर्श कक्ष, समुदायमा आधारित स्वास्थ्य परिक्षण, मानसिक स्वास्थ्य प्रवद्र्धन कार्यक्रम अन्तर्गत महिला स्वास्थ्य स्वंयमसेविकालाई मानसिक स्वास्थ्य सम्बन्धी अभिमुखिकरण, प्रयोगशाला सबलिकरण लगायतका कार्यक्रम सञ्चालन गरिनेछ । एक तथ्याकं अनुसार, मृत्युको प्रमुख कारण मध्ये मुटु रोग, नसर्ने रोग प्रमुख छन् । समुदायमा आधारित स्वास्थ्य परिक्षण अन्तर्गत नसर्ने रोगको जोखिमबारे पत्ता लगाउन स्थानीय तहहरुमा स्वास्थ्य परिक्षण सञ्चालन गरिसकेको कैनीले जानकारी दिए ।
कार्यालयले नसर्ने रोग न्यूनिकरणको लागि शहरी स्वास्थ्य कार्यक्रमबारे जानकारी गराउने उद्धेश्यले अभिमुखिकरण समेत सञ्चालन गरेको छ । मंगलबार नमोबुद्ध नगरपालिका भकुण्डेवेशीमा जनप्रतिनिधी, कर्मचारी, स्वास्थ्यकर्मी, सञ्चारकर्मी लगायतका सरोकारवालाहरुको सहभागितामा अभिमुखिकरण सम्पन्न गरियो ।
कार्यक्रममा नमोबुद्ध नगर प्रमुख कुनसाङ स्वास्थ्य क्षेत्रलाई पहिलो प्राथमिकतामा राखेको भन्दै विकास बजेट कटाएर भएपनि स्वास्थ्य क्षेत्रम लगानी गर्ने बताए ।
प्रमुख प्रशासकीय अधिकृत कृष्ण गिरी नगरमा रहेको मेथिनकोट अस्पताल र अरु स्वास्थ्य संस्थाको सेवा विस्तार गरी नागरिकलाई लाभ पुर्याउनुपर्ने बताए ।
जनस्वास्थ्य कार्यालय काभ्रेका प्रमुख रागिश्री कक्षपति श्रेष्ठले नसर्ने रोगको जोखिम न्यूनिकरणको लागि नगरपालिकासंग सहकार्य गर्ने बताइन् ।
नेपाल पत्रकार महासंघ काभ्रे शाखाका सचिव नगेन्द्र अधिकारीले नगरपालिका भएर पनि सूचकांकको हिसाबले पछि परेकालाई प्राथमिकतामा राखेर काम गर्न अनुरोध गरे ।
प्रतिक्रिया दिनुहोस