असोज १९, काभ्रे। काभ्रे जिल्लालाई कुकुरको टोकाईबाट हुने रेबिज रोगबाट हुने मानविय क्षतिलाई शून्यमा पुर्याउने प्रतिबद्धता गरिएको छ । आज (मंगलबार) काभ्रेको धुलिखेलमा आयोजित रेबिज रोग नियन्त्रण स्थानिय तहसंग सहकार्य र भावीदिशा विषयक अन्तरक्रिया कार्यक्रममा जिल्लाका १३ वटै स्थानिय तहका जनप्रतिनिधिहरुले हातेमालो गरी वि.सं. २०८७ सम्म काभ्रेलाई रेबिज रोगबाट हुने मानविय क्षतिलाई शून्यमा पुर्याउने प्रतिबद्धता पत्रमा हस्ताक्षर गरेका हुन् ।
काभ्रेमा मात्र कुकुरको टोकाईबाट हुने रेबिज रोगबाट एक वर्षमा ५ जनाको मृत्यु हुने गरेको तथ्यांक रहेको छ । चौरीदेउराली गाउँपालिकामा ३ जना र धुलिखेलमा २ जनाको रेबिज रोगबाट मृत्यु भएको हो ।
यसैगरी, प्रतिबद्धता पत्रमा रेबिज रोग नियन्त्रणका लागि आवश्यक पर्ने साधन स्रोत, खोप, जनशक्ति, तथा प्रविधिको प्रयोग, घरपालुवा कुकुरको दर्ता, बन्ध्याकरण र फोहरमैला व्यवश्थापन लगायतका कार्यबाट सामुदायिक कुकुरको संख्या नियन्त्रण गर्ने, रेबिज रोग नियन्त्रणका लागि तीन तहका सरकारविच एकआपसमा हातेमालो गर्दै सहयोग आदानप्रदान गर्ने र सोहि क्रममा खोप तथा क्षमता अभिबृद्धिका कार्य संघिय सरकारबाट व्यवस्थापन गर्ने र रेबिज रोगबारे जनचेतनामूलक कार्य प्रभावकारी रुपमा संचालन गर्न संचार क्षेत्रको अधिकतम् उपयोग गर्ने बुदाहरु समेटिएका छन् ।
प्रतिबद्धता पत्रमा पशु सेवा विभागका महानिर्देशक डा. दमयन्ती श्रेष्ठ, कृषि तथा पशुपन्छी विकास मन्त्रालयका सचिव डा. गोविन्दप्रसाद शर्मालागायतले हस्ताक्षर गर्नुभएको थियो ।
अब्यवस्थित शहरीकरण, फोहरमैला, बधशाला र कुकुरको संख्या बढेकाले पनि रेबिज रोगको जोखिम बढ्दै गएको भन्दै सहभागीहरुले चिन्ता व्यक्त गरेका छन् ।
पशुसेवा विभाग र एफ.ए.ओ ले कार्यक्रमको आयोजना गरेका हुन् ।
कार्यक्रममा जिल्लाका १३ वटै पालिकाका प्रमुख, उप-प्रमुख, कृषि तथा पशुपन्छी शाखा प्रमुख, कर्मचारी तथा संचारकर्मीहरुको उपस्थिीती रहेको थियो ।
प्रतिक्रिया दिनुहोस