रोशी गाउँपालिकाद्वारा भूकम्प प्रभावित दुई जिल्लाको लागि पौने सात लाख सहयोग

रोशी \ रोशी गाउँपालिकाले भूकम्प प्रभावित जाजरकोट र रुकुम पश्चिमको लागि पौने सात लाख आर्थिक सहयोग गर्ने निर्णय गरेको छ ।

गाउँ कार्यपालिका बैठकले ती जिल्लामा राहतको लागि ६ लाख ७४ हजार ४ सय ३६ रुपैयाँ प्रधानमन्त्री दैवि प्रकोप उद्धार कोषमा जम्मा गर्ने निर्णय गरेको अध्यक्ष दिनेश लामाले जानकारी दिए ।

गाउँपालिकाको विपद् व्यवस्थापन कोषबाट एक लाख, गाउँपालिकाका जनप्रतिनिधिहरुको १५ दिनको सेवा सुविधा बराबरको रकम ३ लाख ६७ हजार २ सय ५०, अधिकृतस्तरका कर्मचारीहरुको २ दिनको तलब र सहायकस्तरका कर्मचारीहरुको १ दिनको तलब बराबरको रकम २ लाख ७ हजार १८६ गरी कूल रकम ६ लाख ७४ हजार ४ सय ३६ रुपैयाँ प्रधानमन्त्री दैवि प्रकोप उद्धार कोषमा जम्मा गर्ने निर्णय हो ।

उक्त रकम राहत कोषमा शुक्रबार जम्मा गर्ने गाउँपालिकाका प्रमुख प्रशासकीय अधिकृत रामबहादुर तामाङले जानकारी दिए ।

बैठकले मृतकप्रति श्रद्धाञ्जली र घाइतेहरुको सिघ्र स्वास्थ्य लाभको कामना समेत गरेको छ ।