पनौती / गृहमन्त्री रमेश लेखकले पनौती नगरपालिका वडा नं ६ मा निर्माणाधीन राष्ट्रिय प्रहरी प्रशिक्षण प्रतिष्ठानको अवलोकन गरेका छन् ।
शुक्रवार काभ्रेको पनौती आएका उनले प्रतिष्ठानका लागि निर्माणाधिन भौतिक संरचना र यसको प्रगतिबारे जानकारी लिएका हुन् ।
निर्माण कम्पनीका प्रमुख इञ्जिनियर राजेश कुमारले गृहमन्त्री लेखकलाई प्रतिष्ठानको भौतिक प्रगति र आर्थिक प्रगतिबारे जानकारी गराएका थिए ।
भारत सरकारको १० अर्ब १ करोड ५० लाख अनुदानमा निर्माण भइरहेको प्रतिष्ठान ३ बर्षमा सक्ने गरी २०७९ असार १३ गते सम्झौता भएको थियो । २०७९ असोज ७ गते तत्कालिन गृहमन्त्री बालकृष्ण खाँडले शिलान्यास गरेका थिए ।
प्रतिष्ठानका लागि करिब ६ सय ५० रोपनी क्षेत्रफलको परिसरमा प्रशासनिक भवनका अलावा कर्मचारी आवास, ३५ कक्षा कोठासहितको तालिम कक्ष, प्रयोगशाला, २ वटा तालिम हल, प्रेक्षालय, खेलकुद कम्प्लेकस, सपिङ कम्प्लेक्स, बैंक, एटिएम, ओलम्पिक क्षमताको स्विमिङ पुल, २४ बेडको अस्पताल, हेलिप्याड, हतियार भण्डारण कक्ष, फाइरिङ रेञ्ज निर्माण भइरहेको छ ।
प्रमुख इञ्जिनियर राजेश कुमारका अनुसार, २०८२ असार २८ गते निर्माण सम्पन्न गर्ने गरी सम्झौता भएको परियोजनाको अवधी ३ सय ३० दिन मात्रै बाँकी रहँदा भौतिक प्रगति ३१ प्रतिशत छ । वित्तिय प्रगति पनि २४ प्रतिशत मात्रै छ । परिचालन गर्न दिएको ठेक्काको १० प्रतिशत रकम समेत जोड्दा वित्तिय प्रगति ३४ प्रतिशत मात्रै छ ।
कार्यत्रममा नेपालका लागि भारतीय राजदूत नवीन श्रीवास्तवले उच्च तहको भ्रमण, निरिक्षणले कामको गति बढाउने विश्वास व्यक्त गर्दै समयसिमा भित्रै सम्पन्न गर्न लागि परेको बताए । निर्माणको लागि माष्टर लिष्ट स्विकृत हुन समय लागेको भन्दै उनले योजना समयमा नै सम्पन्न हुनु दुवै देशको लागि गौरवको बिषय भएको बताए ।
जवाफमा गृहमन्त्री लेखकले समयमा नै गुणस्तरीय निर्माण हुने विश्वास व्यक्त गर्दै भारत सरकारले नेपाललाई उपलव्ध गराएको महत्वपूर्ण कामको लागि धन्यवाद व्यक्त गरे । माष्टर लिष्ट स्विकृत गर्ने लगायतका काम समयमा नै हुने आश्वस्त पार्दै उनले नेपालको तर्फबाट कुनै पनि किसिमको समस्या नहुने बताए ।
प्रतिक्रिया दिनुहोस